الوجع

على قد الحب بيكون الوجع ... وعلى قد الحب بيكون العقاب وبحجم الحب بتبقى خيبة الامل والسقوط
بنحب .. ونعشق .. وندى .. ونتجرح .. ونتوجع
لما الوجع بييجى بقى بتلاقى نفسك فريسة لكل الالام الى ممكن تتخيلها
لما الوجع بييجى ... بييجى معاه مشاعر صعب قوى تتخيل انك تعيشها
لما الوجع بييجى .. ذرات كيانك بتتهز هزة جامدة قوى ... رعشة شديدة محستهاش قبل كده  وانت وقوتك بقى بعدها
يا تلم ذرات كيانك الى اتبعتر ... وتلملم شمل مشاعرك وتداوى جراحك بنفسك وتعمل لنفسك بكره احسن
بنفسك
او تفضل فى حالة بعثرة الذرات دى  ... لا انت قادر تعيش مرتاح ولا انت قادر تتقدم  لقدام  خطوة واحدة

بتحس نفسك كده بتسبح فى برزخ من الالام اللانهائية ... وجع ملوش نهاية ... وجع وبسسسسس
لكن لو دققت النظر كويس فى الى حواليك حتكتشف ان الدنيا مفيهاش حاجة اتغيرت
لسه الصبح بييجى والشمس بتشرق ... لسه الطيور بترجع اعشاشها ساعة الغروب
لسه البحر لونه ازرق والزرع اخضر والشعر فيه ابيات لما بنقراها بندوخ من جمالها
لسه كل حاجة حلوة موجودة متغيرتش ... احنا الى بنتغير ... واحنا وشطارتنا بقى
يا الوجع يغيرك للاحسن
يا ياخدك لتحت فى اعماق بير عميييق من السواد

من اجمل المشاهد السينيمائية الى بتعجبنى وبتأثر فى مشهد حلا شيحة مع هانى سلامة ف السلم والتعبان
لما اكتشفت انه شايفله شوفه وقرر انه مش قادر يستمر كده فى دور الحب والرومانسية الهبلة فبينفصلوا
على قد صدمتها فيه على قد ما هى كانت فى حالة سلام مع نفسها  وقالته  جمل حزينة قوى ورقيقة قوى وقوية قوى
قالتله انها مش ندمانة عشان هى عاشت حب جميل قوى وحقيقى قوى ومش زعلانة عشان الحب هو اجمل حاجة فى لدنيا
والحقيقة هى لو حزنت فالمفروض تحزن على نفسها لانها اختارت الشخص الغلط  عشان تعيش معاه المشاعر الحلوة دى
بس معلش .. محدش بيتعلم بالساهل والاكيد أنه محدش حيستفيد حاجة من جلد الذات
محدش حيستفيد حاجة من لطم الخدود وهدر الدموع على الى باع وخان وغدر ورحل
لو كان البكى على الاموات بيرجعهم مكنش حد بطل نواح
طبطب على نفسك عشان محدش حيطبطب عليك زى نفسك
قرب حبايبك منك وخليهم يدفوك وحس بالدفا
حس بالحب الحقيقى المنزه من اى غرض او خداع
حس بالقلوب الحلوة الى محوطاك واشكر ربنا على نعمته انك لقيت كل دوووول جنبك
بص ع الى خدعك او خانك او افترى عليك او ضحى بيك عشان تفاهات وحقارات الدنيا وشوفه صغير
شوفه بيصغر بيصغر لحد ما يبقى زى الفسفسوسة ... لا هو اصلا فسفوسة وانت الى كنت متخنها شوية

معلش متقساش على نفسك .. الحب كتير بيعمينا
والثقة فى الاشخاص الغلط بتوصلنا لنهاية صعبة قوى
بس دروس الدنيا هدايا لازم نحسن استقبالها ونقول اتعلمنا وشكرا يا دنيا على الدرس
مينفعش نعدى عليها عادى كده ولا كأن حاجة حصلت والا نبقى نستاهل خيانة الخونة 

وغدر الجبناء وشماتة الاقزام

مينفعش نعمل نفسنا متوجعناش او نرفض نعيش الوجع لا اتوجعنا .... واتوجعنا قوى كمان بس اتعلمنا واتعلمنا قوى  كمان والتعليم مش ببلاش .... استقبل الدرس بهدوء .... عيد حساباتك .... اعرف ان بكره جاى جاى مهما عافرت وانكرت فخليه ييجى وانت مهيأ للأفضل ... خليه ييجى وانت زايد حكمة ورحمة بنفسك وحب ليها  حلق بجناحاتك وطييييير بعيد عن الوجع والالم .... حلق بجناحاتك وعييييش الدنيا وشوفها بتديلك فرصة جديدة لحياة أفضل احسن استقبالها .... حبو نفسكم عشان تقدروا تحبوا الى حواليكم .... حبو نفسكم عشان هى بجد بجد ... تستاهل تتحب