الخميس، 28 يوليو 2016

خمسين فى المية يا حمادة

مقالى فى البداية  فى 12 مايو 2015

بكره امتحان هنا بنتى ..... فضلة خيركم عندها ابتدائية ... شهادة يعنى زى ما بيقولوا
مش قادرة اقولكو الانهيار والتوتر عندى وعند باقى الماميهات شكله ايه
طوارئ فى البيت ... ترقب ... قلق .... اى كائنات صغيرة مخلصة امتحاناتها (زى جنى بنتى الصغيرة) مصيرها تتربط فى رجل السرير عشان متعملش تشويش للاستاذة الى فى شهادة
اى تليفونات ممنوع ... اى كارتون ممنوع ... اى طلب مجاب للديكتاتورة الى فى شهادة ... اخرها لسه داخلة على تقولى عاوزة كريب بالسوسيس فى الغدا .... بصيتلها بصة العبد للسيد وقلتلها عيونى يا حبيبتى المهم تركزى
مع انى مش فاهمة ايه علاقة الكريب بالعربى والنحو والنصوص العجيبة الى الوزارة بتختارهالهم بعناية فاااائقة عشان تكرههم فى الشعر أكيد وتحسسهم ان الشعر ده عبارة عن اى كلام بيتحط جنب بعضه المهم يكون موزون ... يعنى حاجة كده من عينة  الاخلاق والوفاق وممكن الرقاق والسماق المهم نوزنه وخلاص !!!!!

ببص لنفسى ولباقى الماميهات فى الوقت ده من السنة الاقينا للانهيار عنوان .... مناهج عجب وامتحانات أعجب وكل موجه بيحط الامتحان شايفها عيبة فى حقه لو حط الامتحان للبشر العاديين بتوع كوكب الارض المسكين لازم يحطه لاطفال كوكب بطليموس الخامس الى بيتميزوا بامتلاكهم 5 مخ وصلحه

معجنة حقيقية بيتحط فيها الولاد واهاليهم وبجد معرفش ايه السبب ؟؟؟  بقالنا عقود طويلة بنتمنى ان التعليم يتطور ويتحول من حشو ملوش اى قيمة للدماغ لتعليم حقيقى ومعلومات بجد تفضل وتبقى للابد فى دماغ العيال
وبرضه مبيحصلش
السؤال بقى مبيحصلش ليه
ممكن نعملها سؤال بجايزة من بتوع 0900
الاحتمال الاول علشان منعرفش نطور منظومة التعليم
الاحتمال التانى علشان مش عايزين نطورها
الاحتمال التالت لو اتعلمنا صح العيال حتطلع لا قدر الله بتفهم بجد
الاحتمال الرابع لو اتطورت المنظومة والعياذ بالله الاهالى حترتاح ومش حتتعذب
الاحتمال الخامس كل ما سبق

بجد مش فاهمة احنا حنفضل لحد امتى نلف فى الدايرة المفرغة دى ؟؟؟ ونتعذب بيها عذاب اخر خمسة وتسعين حاجة
مهو المجموع مينفعش يبقى اقل من كده يا حمادة والا يبقى جرسة وفضيحة فى نظر مغلقى العقول ومتحجريها ... الناس بتاعة ان فاتك الميرى والكلام ده ... الناس بتاعة انت خريج ايه عشان احترمك يا اسطى

المفارقة العجيبة بقى هى انى منهارة زى اى مامى رغم انى من حوالى سنة عرفت معلومة تنسف كل الى انا وباقى الماميهات فيه ده
قاللك ايه بقى يا مؤمن .... هرم الادراك فضلة خيرك يتكون من 6 درجات 3 درجات سفلى ( low order thinking skills  ) و3 درجات عليا ( high order thinking skills  )
يعنى هرم الادراك بمراحله الستة فيه مهارا دنيا ومهارات عليا للناس اصحاب العقول والادراك المتقدم جداااااااا ( بنتكلم فى عصام حجى بقى وزويل)
المهارات الدنيا من الاخر للاول هى مهارة التذكر يعنى الحفظ  ( knowledge  ) ثم المهارة الخامسة الى هى  الفهم ( comprehension  ) ثم المهارة الرابعة التطبيق ( application  )
نتنقل بقى للمهارات العليا الى الناس الى بتتمتع بيها بتبقى سوبر وهى المهارة التالتة التحليل ( analysis  ) والتانية هى التركيب ( synthosis  ) ثم المهارة العليا والاولى وهى التقييم (evaluation )

حد خد باله من حاجة ؟؟؟ ان المهارة والقيمة الى بيعتمد عليها تعليمنا ترتيبها فى هرم الدراك والمهارات هو رقم 6
يعنى اقل مهارة على الاطلاق فى الهرم هى الحفظ والصم ..... عارفة انها صدمة كبيرة لان نظام تعليمنا بيعتمد عليها بشكل مطلق
يعنى اى حمادة جاب ال95 فما فوق هو جابهم فى الحفظ والصم وبسسس يعنى من الاخر مجابش الديب من ديله واسفة انى بصدمكم
تلاقى الحمادة من دول داخل كلية القمة منفوخ ومش طايق نفسه من المجموع الى شايله فوق كتافه بعد سنين الثانوية العامة العصيبة وهو فى الحقيقة شاطر فى الصم والحفظ لالالالالا غير
وده مش اختياره بالتأكيد ولا اختيار اهله لكنها منظومة عقيمة مفروضة علينا كلنا احفظ تسلم ... صم عشان توصل لكلية محترمة والناس تقول عليك محترم
اعرف صديق عزيز بعتبره من عبقريات الكتابة فى زمننا الجاى ... شاب صغير نابه ونبغة ونادر بجد ... النابه النادر النبغة كاتب رواية نقل عام حاليا مش قاعد بيبدع عمل جديد يثرى بيه وجدان المجتمع ... لا خالص ...
هو قاعد بيصارع هو وعيلته زينا كلنا فى دوامة الثانوية العامة
بصراحة اى عبث الى بنعيشه ده ؟؟؟ وليه مفروض عليه يعمل كل ده وهو نبغه فى مجاله وليه لازم يدرس  رياضة واحصا وانجليزى وايطالى وفرنساوى ووووو عشان فى الاخر يرجع يعمل الى ه بيبدع فيه وبس !!!! بجد اى عبث

اعرف صديقة لى كان كل دعاءها الفترة الى فاتت يارب الدراسات تموت او الى بيحط منهجها بالشكل العقيم ده يبدل عقله ويرحمنا ويعض المعلومة بشكل مختلف العيال بتغرق تغرق تغرق
اعرف صديقة تانية ابنها عنده بشاير موهبة فى التصوير وغالبا هو ده المجال الى حيحترفه فيما بعد وبرضو قاعد يحفظ ويصم فى مناهج لا تستهدف من عقول اولادنا الا المهارة الدنيا فى هرم ادراكهم ولا تستهدف من اجسام اهاليهم الا مراراتهم
اعرف بقى صديقة موهوبة جدا فى تصميم الازياء وطول النهار بترسم تصميمات تحفة ... طبعا هى لا مصممة مشهورة ولا بتدرس فى اى اكاديمية فاشون ... هى حاليا بتعمل دبلومة فى القانون عشان المجتمع عاوز كده !!!!!!!!!!!

عندنا نظام عقيم ... ده اكيد .... احنا راضخين ليه ... ده قطعاً .... حنعقد العيال لو فضلنا مستسلمين كده ... شور يا بيبى
الملفت اننا لو فكرنا فى نهضات الشعوب والناس الى اساميها البارزة عملت النهضات د ى بنلاقى اسامى الفنانين والادباء والشعراء قبل اى اسم ... المبدعين وبس .. مش مهم المجال بس المهم انه ابدع واختلف واتميز بجد 
الفكرة انك تعمل وتدرس الى انت شايف نفسك ممكن تدى فيه بشكل استثنائى وبس
الفكرة انك تقرر متبقاش عدد فى اللمون عشان محصول اللمون خلاص باظ من كتر ما بنعصره على نفسنا عشان نتقبل واقع مفروض علينا

محتاجين اكاديميات تعليم بديل ... تعليم مختلف ... ندرس فيها الى بنحبه وبس ... ندرس فيها الى ممكن نتفوق فيه وبس
ميدخلش الطب الا ال قادر يمارسه كرسالة مش نحتاية وسبوبة .... ميدخلش  الهندسة الا الى مستوعب انها فى الاصل فن دقيق يحتاج منك روح راقية تقدر تقدم تصميم محصلش يرفعك ويرفع بلدك
ميدخلش سياسة واقتصاد الا الى قادر يكون واجهة للبلد دى ويرفع شانها ويمثلها تمثيل بجد مشرف مش لانه بيعرف يصم وجاب ال95 وبابى ومامى سفرا وبسسسس

محتاجين اكاديميات تعلم ولادنا الموهوبين التصوير والفنون والكتابة واى مجال محتاجين يتعلموه وبس والشرط الرغبة والقدرة على تعلمه فقططططط
محتاجين نعلم ولادنا ميزعلوش من اى مجموع يجيبوه لانه فى الحقيقة لا يعبر عن شيئ سوى مستواهم فى المهارة الدنيا من هرم الادراك الى ممكن بمنتهى البساطة نلاقى كتير منهم مبيتمتعوش بيها لكنهم مبدعين فى الاعلى منها
ببساطة محتاجين نقول لحمادة ميزعلش قوى لو جاب 50 فى المية لانه ببساطة ..... بيفهم وبيبدع وبس






http://albedaiah.com/writers/%D9%85%D9%86%D9%89-%D8%B9%D8%A8%D8%AF-%D8%A7%D9%84%D8%B9%D8%B2%D9%8A%D8%B2

صعبانيات

مقالى بالبداية فى 5 مارس 2015

بحب الرحبانيات ... ابداع والله الست فيروز والاخوان رحبانى ناس عندهم طاقة عجيبة بيخرجوها فى الحان مبدعة ومعانى رقيقة بموت فى فيروز وهى بتقابل حبيبها القديم وكل الى عاوزاه منه انها تتطمن عليه وبس وتقوله كيفك انت ؟؟ وبحبها قوى وهى بتوصف مشاعرها الرقيقة المخنوقة من انها بتراقب ناس كتير بتستنى حبايبها على المفرق فى ايام الشتا عشان يتقابلو رغم الشتا وهى بتحزن على حالها انها حتى فى ايام الصحو ما حدش بيستناها ( وانا فى ايام الصحو ما حدا نطرنى )... وبعشقها وهى بتقول لحبيبها يتطمن وانها حتفضل حبه صيف وشتا ... وتستناه صيف وشتا ...وبتأملها قوى وهى بترمى كل اسباب تعبها على حبيبها وتقوله يا حبيبى يا حبيبى يا حبيبى انك السبب وكانها بتستمد كل اسباب حياتها منه ... سعادتها او شقاءها بسببه هييييح فظاع ولاد الرحبانى وفيروز ومن حقهم يتسمى اتجاه غنائى كامل باسمهم ( الرحبانيات)
احنا بقى هنا فى مصر اخترعنا اجمد اتجاه غنائى .... الصعبانيات يا مؤمن !!!!!!!!! تلاقى المطرب من دول طول الوقت بيتصعب على نفسه وعلى حاله الدنيا ماشية بضهرها وانا الضحية !!!! طيب حضرتك ما تروحلها الناحية التانية يمكن تشوف وشها يا برنس..... الدنيا زى المرجيحة يوم تحت ويوم فوق انا بتقطع من جوايا ونسيت طعم الفرح
انا مش عارفنى انا تهت منى وانا مش اناااااااااا رافضك يا زمانى يا اوانى يا مكاااانى انا عايز اعيش فى كوكب تانى نواح نواح نواح طول الوقت .... والعجيب ان توزيع الحاجات دى بيزيد ومعدلات انتشارها وهمية وكله كوم والاخ الى نصب نفسه فلتر ع النار والجنة وقعد يقول بوسى حتروح النار ولوسى حتروح النار وهيفا حتروح النار وفيفى حتروح النار كان ناقص يقول قطعا كلكم فى جهنم وبئس المصر .... طيب مش يمكن يتوبوا يا كابتن ؟ واللا حضرتك قفلتها فى وشهم كده بالضبة والمفتاح
الصعبانيات فى مصر بقت اسلوب حياة للاسف مش اسلوب غناء بس الكل بينوح على حاله اووول ذا تايم وكان الجميع يتسابق على جايزة أكثر مسكين فى العالم الى محد قال او فكر يخرج من التابوه ده كله بيشتكى وبيتصعب على حاله وبيدور طول الوقت بهستريا مرضية عن تعاطف الى حواليه لاثبات انه صح وغلبان ومسكين ومكسور والدنيا دايسة عليه بالقوى افتكر كان فيه كاتب روسى عظيم جدا كتب روائع ... بيحكوا انه ضيع حياته هو ومراته فى سرد وتوثيق القصة والقصة الاخرى فى حياتهم بهدف كسب اكبر قدر ممكن من التعاطف والانصاف ممن حولهم بل وطمعوا ومنتظرين الانصاف ده من الاجيال القادمة ... يا لهو بالى يا جدعان منتظرين الانصاف بعد ما تموتوا وتبقوا تراب ....انتو بجد والللا كارتون طيب ولما ييجى الانصاف حيحصل ايه يعنى ولما اخد جايزة اكبر مسكين حيحصللى ايه يعنى ... ان شاء الله والف الف مبروك
الناس بقت بتعيا علشان تكتب ع الفيسبوك انا عيان ويقعد يعد عدد اللايكات والتعليقات ولما محدش يرد يجروا يكتبوا انا اتصدمت فى اقرب الناس لى !!! ايه الى بيحصل فى شخصية المصريين وايه الى مودياهم ليه رجليهم
محدش فكر يركز مع نفسه ويصلح من حاله بدل ما يركز مع الناس ويهتم بصورته ف عنيهم اكتر من صورته قدام ربنا وقدام نفسه ... ساعات بحس حقيقى اننا خلينا ربنا فعلا أهون الناظرين الينا ....
الناس يوم ما تتصعب على حالنا مش حينفعونا بحاجة
ويوم ما يدينونا ويشوفونا مجرمين ووحشين وبشعين مش حيضرونا بحاجة
من الرائع اننا نشوف نفسنا ابطال لكن ابطال ليسوا من ورق
من الملهم اننا نشتغل على نفسنا وعلى من حولنا ونحاول نغير الواقع الراسخ الظالم بدل ما نستسلم لظلمه ونستمتع ونستمرئ دور المظاليم
ربنا فى كتابه العزيز قالها قاعدة ومنهاج لا تبديل له مهما عملنا "لا يغير الله ما بقوم حتى يغيروا ما بأنفسهم" يعنى ربنا قالها خطى بس الخطوة الأولى واستمتع بالمدد الربانى بعدها ... والله لو قعدت تلعب دور المظلوم سنين ما حتوصل لأى تغيير حقيقى فى حياتك زى ما ربنا وعد .... ابتدى .... فكر .... غير .... ابتكر ... اتعلم من الامك .... اتعلم من افراحك ... متعديش حاجة من حياتك من غير ما تعرف حكمتها .... حصلت ليه ... راحت ليه .... ووصلت لايه ... اخرج من غرفتك المظلمة لفضاء الله الواسع .... حلق بأحلامك ولا تقتلها فى مهدها .... ضع أهدافك وفقا لامكانيات رب العباد الذى لا يعصى عليه شخص ولا شيئ ... اخرج من ماراثون أكتر حد كئيب وأكبر مجروح وأسوأ واحد عايش فى الدنيا ... بص للى حواليك واحمد ربنا ... مخنوق من شغلك ؟؟ غيرك معندوش شغل اصلا ... متضايق من عربيتك ... غيرك معندوش عربية ... تعبان من المواصلات ... غيرك معندوش رجلين اصلا يركب بيها اى حاجة او يتحرك من مكانه اصلا .... قل الحمد لله .... تنفس بعمق .... تفاءل برب العباد الذى لا يخيب ظن محسن الظن به أبداااااا وانطلق..... انطلق
http://albedaiah.com/articles/2015/03/05/84272

هاتلها ورد يا ابراهيم


وبعودة الايام يا ولاد يرجع لنا مولد سيدى الفالنتين بفقعة المرارة وحسرة القلب ... ما بين سى إبراهيم المطنش ويسرية المستنية ......
يسرية بتراقب فى صمت زى عبده مشتاق بتاع الانتخابات كده .... نفسها إبرهيم يجيبلها وردة فى الفالنتين اللي بيقولوا عليه ده بتشوف مهرجانات محلات الورد وإعلاناتها مهو موسم بقى وخلى الناس تسترزق ...
وبتشوف إعلانات التليفزيون وأغانى المطربين مهو موسم برضه والناس دى بتسترزق على قفانا
وتفضل ياحبة عينى مستنية وإبراهيم مبلط فى الخط
طيب نديله زقة ... طيب نحطله بنزين ... يمكن الشكمان مكتوم نسلكه .... ايه مشكلتك يا سى إبراهيم ..... 
 الدنيا غلا وكوا وربع الجبنة الرومى وصل ل15 جنيه  يااااه 15 جنيه طيب ده الوردة فى العادى ب5 جنيه
وأنت بتجيب ربع الرومى ... مبتجبشى الوردة ليه ؟؟؟
الشيكولاته يا إبراهيم .... يعنى مبتجبشى لعيالك شيكولاته ... لا يا سيد الرجالة بتجيب .. امال فى الفالنتين مبتجبش ليه
يقرب الفالنتين وتنتفخ عروق كل إبراهيم بالتحدى والتوتر وأنا راجل وأنا مش سيس عشان أروح ف الفالنطين (بالطاء)  ده بورد وشيكولاته قدام زمايلى فى الشغل
 ويا وقعة سودة لو سيد البواب شافنى والللا جارى استاذ صهيب السخيف لمحنى
يبقى موقفى ايه
بحب مراتى لا سمح الله
مبسوط فى حياتى بعد الشر
مخلص والعياذ بالله
راجل شيك وبيقدر يعنى يا سلام
قدوة كويسة لغيرى الله لا يقدر
دول حيقولوا على خروف
وخايف من مراتى وبكفى الشر

ولو أن حكاية بتكفى الشر دى حقيقية يا إبراهيم عشان لو متخلتش فى اليوم ده عن ربع الرومى وجبت بداله وردة فأنت حتفتح على نفسك بوابة جهنم ومش بعيد تقابل الوحش فى أخر ليفل
مع يسرية المحسورة المتنكدة اللي مجلهاش وردة ولا فرع فجل حتى
تبدا تحط الخطط علشان توصللك لأكبر قدر ممكن من القرف اللي جواها وأنت شايفها يا حرام نكدية
الست عاوزة تفرح يا إبرهيم وأنت مفرحتهاش ... مين بقى اللي نكدى ؟؟؟
الست عاوزة تفرح لأى سبب ... حتى لو كان بعيد عنك عيد المدعوق الى اسمه فالنتين ده فالست عاوزة تفرح
يعنى لو أنت مفرحتهاش .. مين يعنى اللي حيفرحها
لو مقلتلهاش أنت الكلام الحلو وحسستها أنها ست الستات ... حترتاح لو سمعتها من بره ؟؟ ولا هى حترتاح ولا أنت حترتاح
ابهاتنا وجدودنا زمان كانوا يوصوا الراجل ويقولوله كفى بيتك يابنى .... بس الكفاية يا إبراهيم مش فى الاكل والجبنة الرومى ... الجوع ساعات بيبقى فى حاجات تانية كتير
يمكن أنت بتعرف تقولها صريحة وتجعر ساعات أنا جعاااااان .... بس يسرية تتقهر قوى لو قالتها وصرحت بيها أنها جعاااااانة ... جعانة حب وحنان واحتواء وربنا جعلك أنت الوحيد اللي ملزوم تديهولها
أنا عارفة انك راجل جدا ... وراجل قوى
ومش حتسيب المجتمع المعوق والناس الكئيبة والناس البخيلة تأثر عليك وتحسسك أنك ناقص حاجة علشان بتكفى بيتك عواطف وجبنة رومى
انا عارفة أنك أشجع من جارك البخيل وصاحبك الكئيب وزميلك النمطى اللي  ماشى ورا القطيع
أنت احسن من كل دول
انت حتشترى الوردة وتروح لحبيبتك الوحيدة يوم الفالنتين وتقولها كل سنة وانتى طيبة يا ست الستات
كل سنة وانتى فى قلبى
كل سنة وانتى معايا خدمانى ومستحملانى ومراعيانى وشايلانى فى صحتى ومرضى
مش خسارة أى حاجة فيكى حتى لو بتاع الورد المستغل خلى الوردة ب30 جنيه
ادتها عمرك كله .... مش عارف تديها وردة
كل سنة وانت طيب يا سيد الرجالة
كل سنة وانت طيب يا إجدع إبراهيم
ومش حوصيكى بقى يا ست يسرية ملكيش حجة  الوردة جت اهه ... حب بقى حب حب حب يغرق البيت والدنيا كلها .......



مقالى بالاتجاه نيوز فى 12 فبراير 2015



http://aletgahnews.com/news/View/75639/%D9%87%D8%A7%D8%AA%D9%84%D9%87%D8%A7+%D9%88%D8%B1%D8%AF+%D9%8A%D8%A7+%D8%A5%D8%A8%D8%B1%D8%A7%D9%87%D9%8A%D9%85/#.V5m679J95dg